Tula: Kung Hindi na Pag-ibig

Hindi naman ako bitter. 

Ito lang talaga ang naisip ko tungkol sa mga umiibig, naghahanap ng pag-ibig, 

naniniwalang sila'y iniibig. 

*****

Kung Hindi Na Pag-ibig

Kung hindi na pag-ibig ang sa atin ay nagbubuklod

Hayaan mo ako na lumayo at tumalikod

Umiyak, sumigaw at magmukmok

Kaysa pigilan, amuin at bulungan ng pangako.

Kung hindi na pag-ibig ang nararamdaman

Huwag nang magkunwari at magmaangmaangan

Mabuti na magsabi at magpaalam

Kaysa ipilit na ako pa rin ang mahal.

Kung hindi pag-ibig ang dahilan ng paglapit

Kalimutan na ang mga salitang matatamis,

Mabubulaklak na pangako na nagpapangiti

Ngunit kasawian ang dulot sa huli.

Kung hindi pag-ibig ang sa atin ay nagbubuklod

Bumitaw na tayo bago pa mauntog

Masaktan, manghina at madurog

Kaysa sa hilaw na ligaya tayo malunod.

-Marvie-